Një studim i fundit nga Instituti i Teknologjisë në Massachusetts (MIT) ka ngritur shqetësime serioze mbi ndikimin e inteligjencës artificiale në aftësitë mendore të përdoruesve. Sipas këtij hulumtimi, përdorimi i shpeshtë i platformave si ChatGPT mund të çojë në një dobësim të aftësive për të menduar kritikisht.
Studiuesit vërejtën se shumë përdorues, në vend që të analizojnë dhe arsyetojnë vetë, priren të mbështeten plotësisht në përgjigjet që u ofrohen nga modelet e gjuhës si ChatGPT. Kjo qasje, sipas tyre, rrezikon të zhvlerësojë aftësinë individuale për të vlerësuar informacionin, për të formuluar mendime të pavarura dhe për të marrë vendime të informuara.
“Teknologjia nuk është armik, por mënyra si e përdorim atë mund të bëhet problem,” thuhet në raportin e publikuar nga MIT. Sipas tij, përdoruesit që e përdorin ChatGPT si një zëvendësim për të menduarin vetanak janë më pak të prirë të kontestojnë informacionin që marrin dhe më të predispozuar të pranojnë pa diskutim çfarë u servohet.
Në një kohë kur inteligjenca artificiale po bëhet gjithnjë e më e pranishme në jetën e përditshme, ky studim ngre nevojën për edukim digjital dhe zhvillimin e shkathtësive të mendimit kritik në të gjitha nivelet e shoqërisë.
Ekspertët këshillojnë që AI të përdoret si mjet ndihmës, jo si zëvendësim i arsyetimit njerëzor. Vetëm në këtë mënyrë, thonë ata, mund të përfitojmë nga teknologjia pa rrezikuar aftësitë tona më themelore si qenie menduese.
