Ish-kryetari i Lëvizjes Vetëvendosje, Visar Ymeri, ka komentuar të dhënat më të fundit nga sondazhi i UBO Consulting, të publikuara në emisionin “Debat Plus”, ku rezulton se mbështetja për partinë në pushtet ka rënë në 37% gjatë muajit qershor.
Në krahasim me 40% në mars dhe 42% sa kishte në zgjedhjet e fundit, kjo shënon një zbritje të dukshme të trendit elektoral të Vetëvendosjes.
Sipas Ymerit, rënia prej rreth 5 pikësh përqindjeje që nga zgjedhjet e fundit, dhe veçanërisht 3.5 pikë nga marsi, është indikator i qartë i humbjes së mbështetjes qytetare.
Ai thekson se kjo situatë është rezultat i perceptimit publik se Vetëvendosje mban përgjegjësi për bllokadën institucionale që po e pengon funksionimin normal të institucioneve.
“Është humbje e ndjeshme për një periudhë kaq të shkurtër, dhe qytetarët po reagojnë ndaj asaj që e shohin si pengesë nga ana e VV-së,” deklaroi ai në emisionin “VV Show”.
Ymeri tha gjithashtu se kjo tendencë duhet të trajtohet me seriozitet nga strukturat partiake, pasi tregon një pakënaqësi të theksuar në rritje në radhët e elektoratit.
