Deputeti i Aleancës për Ardhmërinë e Kosovës, Daut Haradinaj, ka komentuar bllokimin e zgjatur të Kuvendit, duke theksuar se opozita ka ofruar zgjidhje dhe është e gatshme për kompromis të pakushtëzuar.
Në një intervistë në emisionin “DPT te Fidani” në Klan Kosova, ai i bëri thirrje mazhorancës që të mos e mbajë të penguar procesin për egon e një individi.
“Ne kemi ofruar, po ofrojmë zgjidhje, jemi të gatshëm të japim kompromis, kemi thënë pa asnjë kusht,” deklaroi Haradinaj.
“Është e pandershme tash me kërku prej opozitën për egon e një individi që për 37 seanca insiston, edhe e din që produkti është i njëjtë.”
Por deklarata më e fortë e Haradinajt ishte ajo që lidhej me gjendjen e përgjithshme të parlamentarëve. Ai hodhi akuza të drejtpërdrejta, duke aluduar se një numër i konsiderueshëm i deputetëve janë përdorues të substancave narkotike.
“Ka të drejt zonja Mihali kur thotë deputetët, sepse po shihet kush parfumoset e kush bën sfilitë. Nëse do të jemi ndonjëherë në pushtet, kushti i parë do të jetë testimi i narko-konsumuesve,” u shpreh ai, duke shtuar se një pjesë e mirë e tyre nuk duhet të përfaqësojnë qytetarët në Kuvend.
