Deputetja e Lëvizjes Vetëvendosje, Jeta Statovci, ka reaguar pas dështimit të seancës së 37-të për konstituimin e Kuvendit të Kosovës, duke e konsideruar mungesën e pjesëmarrjes në votim si një pengesë serioze për tejkalimin e krizës institucionale.
Në një deklaratë për media, Statovci theksoi se sjellja e partive opozitare po pengon interesin shtetëror dhe po e zhyt vendin në bllokadë të vazhdueshme.
“Egoja e opozitës është më e lartë sesa interesi i Kosovës dhe konstituimi i Kuvendit. Përmes një strategjie sabotuese dhe bllokuese, nuk kemi pjesëmarrje në procesin e votimit.
Ne kemi qenë vazhdimisht thirrës në seancë që të kemi pjesëmarrje në votim – qoftë me votë për, kundër apo edhe me abstenim,” tha ajo.
Ajo i bëri thirrje spektrit politik që të veprojë me përgjegjësi dhe të mos lërë qytetarët pa institucione funksionale, ndërsa theksoi se Vetëvendosje ka treguar gatishmëri për të çuar përpara procesin demokratik.
