Deputetja e Aleancës për Ardhmërinë e Kosovës (AAK), Time Kadrijaj, ka reaguar pas takimit të ftuar nga Albin Kurti me partitë politike. Sipas saj, Gjykata Kushtetuese i ka dhënë të drejtë padisë së ngritur nga subjekti i saj politik.
Ajo u bëri thirrje deputetëve të Vetëvendosjes që të ndalin përpjekjet për votim të fshehtë për komisionin, duke e konsideruar një veprim antikushtetues.
“Gjykata i dha të drejtë lëndës së AAK-së. Shpresoj që VV-ja të mos vazhdojë me shkelje të Kushtetutës,” deklaroi Kadrijaj për mediat.
Ajo shtoi se mënyra për të ecur përpara është kthimi te votimi i hapur, duke i njohur Vetëvendosjes të drejtën për të propozuar kandidatë sipas vullnetit të saj, por edhe përgjegjësinë për të siguruar shumicën parlamentare.
“Është e drejta e VV-së që ta kandidojë kë të dojë. Është e tyrja që t’i gjejnë 61 vota,” theksoi Kadrijaj, duke kërkuar respektim të rendit kushtetues.
