Këshilli Kombëtar Shqiptaro-Amerikan (KKSHA), me seli në kryeqytetin amerikan, ka shprehur shqetësimin e thellë për situatën politike në Kosovë, duke theksuar rëndësinë e një qeverisjeje funksionale dhe të koordinuar në këtë moment kritik për vendin.
Në një deklaratë zyrtare, Këshilli nënvizon se po ndjek nga afër zhvillimet në Prishtinë dhe mbetet fuqimisht i përkushtuar për të mbështetur çdo përpjekje që forcon institucionet demokratike të Kosovës dhe partneritetin e saj strategjik me Shtetet e Bashkuara të Amerikës.
KKSHA e cilëson paralizën institucionale si të pajustifikueshme, duke e lidhur atë me pasoja të rënda për besimin publik dhe për sigurinë e vendit në një kontekst global të ndjeshëm.
“Kjo bllokadë politike minon besimin e qytetarëve, dobëson shtetin dhe e ekspozon Kosovën në një ambient ndërkombëtar gjithnjë e më të paqëndrueshëm,” thuhet në deklaratë.
Këshilli përshëndet vendimin e Gjykatës Kushtetuese të Kosovës si një rrugëdalje legjitime dhe bën thirrje për respektim të shtetit ligjor dhe të autoritetit kushtetues, duke e cilësuar këtë si një trashëgimi të rëndësishme të demokracisë në Kosovë.
Në vijim, KKSHA apelon ndaj të gjitha partive parlamentare që të marrin pjesë në seancën e ardhshme të Kuvendit me ndjenjën e urgjencës dhe përgjegjësisë kombëtare për të zgjedhur Kryetarin e Kuvendit dhe për të formuar qeverinë pa vonesa.
“Vendi duhet të ecë përpara. Mbështetja e SHBA-ve mbetet e palëkundur, por ajo kërkon institucione efektive dhe koordinim të vazhdueshëm,” thekson Këshilli.
Në përmbyllje të deklaratës, KKSHA rikonfirmon rolin e tij si një urë lidhëse mes popullit dhe institucioneve të Kosovës dhe politikës amerikane, duke theksuar përkushtimin për të amplifikuar zërin e qytetarëve kosovarë në arenën ndërkombëtare.
Ky reagim vjen në një kohë ku bllokimi i Kuvendit dhe pamundësia për të formuar qeverinë e re pas zgjedhjeve ka rritur shqetësimet për stabilitetin politik dhe ndërkombëtar të vendit.
