Kryetari i Lëvizjes Vetëvendosje, Albin Kurti, ka deklaruar se partia e tij ka ndërmarrë hapa kompromisi për çështjen e zgjedhjes së kryetarit të Kuvendit të Kosovës, por pavarësisht propozimeve të ofruara, nuk është arritur një marrëveshje mes palëve politike.
Në një prononcim për media pas takimit me liderët e subjekteve parlamentare, Kurti tha se ka paraqitur dy propozime konkrete për të zhbllokuar procesin institucional:
“Propozova që kandidatja jonë, Albulena Haxhiu, të tërhiqet në rast se nuk merr 61 vota në raundin e parë të votimit të fshehtë, dhe që të ketë një marrëveshje për të votuar kryetarin dhe nënkryetarët e Kuvendit si një pako të vetme,” tha Kurti.
Megjithë këto përpjekje, ai nënvizoi se palët e tjera nuk pranuan të bashkëpunojnë në këtë drejtim, duke shtuar se bllokada vazhdon për shkak të mungesës së vullnetit politik për kompromis reciprok.
