Senati i SHBA-së i udhëhequr nga republikanët hodhi poshtë të premten një përpjekje të udhëhequr nga demokratët për të bllokuar Presidentin Donald Trump nga përdorimi i mëtejshëm i forcës ushtarake kundër Iranit, disa orë pasi presidenti tha se do të merrte në konsideratë më shumë bombardime.
Votimi në Senat ishte 53 me 47 kundër një rezolute për fuqitë e luftës që do të kërkonte miratimin e Kongresit për më shumë armiqësi kundër Iranit. Votimi u zhvillua sipas vijave partiake, përveçse demokrati i Pensilvanisë John Fetterman votoi kundër, së bashku me republikanët, dhe republikani i Kentucky-t Rand Paul votoi po, së bashku me demokratët.
Senatori Tim Kaine, sponsori kryesor i rezolutës, është përpjekur për vite me radhë t’i marrë Kongresit autoritetin për të shpallur luftë si presidentëve republikanë ashtu edhe atyre demokratë.
Kaine tha se përpjekja e tij e fundit nënvizoi se Kushtetuta e SHBA-së i jep Kongresit, jo presidentit, fuqinë e vetme për të shpallur luftë dhe kërkon që çdo armiqësi me Iranin të autorizohet në mënyrë të qartë me një deklaratë lufte ose autorizim specifik për përdorimin e forcës ushtarake.
“Nëse mendoni se presidenti duhet të vijë në Kongres, pavarësisht nëse jeni pro apo kundër një lufte në Iran, do të mbështesni Rezolutën e Përbashkët 59 të Senatit, do të mbështesni Kushtetutën që i ka rezistuar kohës”, tha Kaine në një fjalim para votimit.
Ligjvënësit kanë kërkuar më shumë informacion në lidhje me sulmet e fundjavës së SHBA-së ndaj Iranit dhe fatin e rezervave të uraniumit të pasuruar në nivel të lartë të Iranit.
Më herët të premten, Trump kritikoi ashpër Udhëheqësin Suprem të Iranit, Ali Khamenei, hoqi dorë nga planet për të hequr sanksionet ndaj Iranit dhe tha se do të shqyrtonte përsëri bombardimin e Iranit nëse Teherani po pasuron uraniumin në nivele shqetësuese.
Ai po reagonte ndaj komenteve të para të Khameneit pas një konflikti 12-ditor me Izraelin që përfundoi kur Shtetet e Bashkuara nisën sulme bombarduese kundër lokacioneve bërthamore iraniane.
