Kryenegociatori i Serbisë në dialogun me Kosovën, Petar Petkoviq, ka bërë të ditur se të martën është takuar me të dërguarin e posaçëm të Bashkimit Evropian për dialogun Kosovë–Serbi, Peter Sorensen, për të diskutuar situatën aktuale dhe hapat e ardhshëm në procesin e dialogut.
Përmes një postimi në platformën X (ish-Twitter), Petkoviq tha se në takim është biseduar për vazhdimin e dialogut në nivel teknik, si dhe për domosdoshmërinë e normalizimit të marrëdhënieve dhe de-eskalimit në terren.
“Ia përcolla atij shqetësimin serioz për shkak të përkeqësimit të vazhdueshëm të pozitës së popullit serb në Kosovë si pasojë e shumë veprimeve eskaluese të Prishtinës,” shkroi Petkoviq.
Ai nuk specifikoi se për cilat veprime bëhet fjalë konkretisht, por mesazhi i tij vjen në një periudhë kur tensionet ndërmjet Kosovës dhe Serbisë mbeten të larta, sidomos në veri të vendit, ku shpesh ka pasur përplasje mes qytetarëve lokalë serbë dhe autoriteteve të rendit të Kosovës.
Petkoviq theksoi se me Sorensenin kanë diskutuar për rëndësinë e rinisjes së dialogut teknik, i cili ka stagnuar muajt e fundit për shkak të mungesës së progresit në zbatimin e marrëveshjeve të mëhershme, përfshirë Asociacionin e komunave me shumicë serbe – një nga pikat më të debatueshme ndërmjet palëve.
Takimi me Sorensenin vjen disa javë pasi përfaqësues të BE-së kanë paralajmëruar për masa ndaj të dyja palëve në rast të mungesës së vullnetit për zbatim të marrëveshjeve dhe ruajtje të stabilitetit.
Nga ana e institucioneve të Kosovës nuk ka pasur ende një reagim zyrtar për deklaratat e Petkoviqit. Megjithatë, Qeveria e Kosovës në vazhdimësi ka hedhur poshtë akuzat e Beogradit për “eskalim” dhe ka theksuar se veprimet e institucioneve janë në përputhje me rendin kushtetues dhe ligjor të Republikës së Kosovës.
