Një ngjarje tronditëse ka goditur botën e futbollit. Sulmuesi i Liverpool-it, Diogo Jota, dhe vëllai i tij André Silva humbën jetën në një aksident tragjik me makinë pranë qytetit Zamora në Spanjë, të enjten. Varrimi i tyre do të zhvillohet të shtunën, më 5 korrik, në orën 10:00 të mëngjesit, në kishën Matriz de Gondomar, 33 kilometra larg qytetit të Portos në Portugali.
Trupat e pajetë të vëllezërve mbërritën në qytetin e tyre të lindjes pak para mesnatës së së premtes, ku u pritën me duartrokitje dhe lot nga banorët lokalë, të cilët kishin dalë për t’i dhënë lamtumirën e fundit dy figurave të dashura për komunitetin.
Një ceremoni mortore (wake) është planifikuar të mbahet të premten pasdite në orën 16:00 në Capela da Ressurreição São Cosme, ku familjarë, miq dhe bashkëlojtarë janë mbledhur për të bërë nderimet e fundit.
Sipas autoriteteve spanjolle Guardia Civil, hetimet për shkaqet e aksidentit janë ende në vijim, por hetimi paraprak sugjeron se shpërthimi i një gome gjatë një parakalimi mund të ketë qenë shkaku kryesor i aksidentit tragjik. Një zyrtar qeveritar spanjoll, Ángel Blanco, tha se automjeti u dogj plotësisht, dhe të dy vëllezërit ndodheshin brenda në momentin e përplasjes.
Sipas fizioterapistit portugez Miguel Gonçalves, Diogo Jota kishte kryer një ndërhyrje kirurgjikale në mushkërinë e djathtë në fund të sezonit dhe ishte këshilluar të udhëtonte me makinë në vend të avionit. Gonçalves zbuloi për gazetën Record se Jota kishte planifikuar të ndalej për pushim në Burgos dhe më pas të udhëtonte drejt Santanderit për të kapur tragetin drejt Anglisë.
“Ishte shumë profesionist dhe i kujdesshëm. Më tha se udhëtimi do të zgjaste rreth tetë orë. Ishte pa dhimbje kur u përshëndetëm të mërkurën në darkë,” – rrëfeu Gonçalves.
Agjenti i njohur Jorge Mendes udhëtoi menjëherë drejt Zamorës për të qëndruar pranë familjes së lojtarëve. Në një deklaratë emocionale për gazetarët, ai tha:
“Kemi humbur dy njerëz të jashtëzakonshëm. Diogo ishte një shembull si njeri, bashkëshort, djalë dhe profesionist. Ende nuk mund ta besoj, është shumë e vështirë.”
Klubi portugez Penafiel, ku André Silva luajti sezonin e fundit, ka shpallur ditë zie kombëtare dhe do të organizojë homazhe në ndeshjet e ardhshme.
Diogo Jota, 27 vjeç, ishte një nga lojtarët më të rëndësishëm të kombëtares portugeze dhe pjesë e Liverpool-it që nga viti 2020. Ai fitoi UEFA Nations League me Portugalin muajin e kaluar dhe pritej të ishte një nga figurat kyçe të sezonit të ardhshëm në Premier League.
