Një reagim i fortë dhe alarmues ka ardhur nga brenda Qendrës Klinike Universitare të Kosovës (QKUK), ku infermieri Enliart Duraku ka ngritur akuza serioze ndaj udhëheqjes së këtij institucioni, duke denoncuar kushtet në të cilat po trajtohen pacientët.
Duraku ka ndarë me mediat një fotografi tronditëse të një vakti ushqimi, që përbëhet nga vetëm dy feta bukë dhe një vezë e zier, të cilin ai e ka cilësuar si “ushqim skandaloz” dhe të papranueshëm për njerëz që janë të shtrirë në spitale për shkak të gjendjes së tyre shëndetësore.
“Ky është ushqimi skandaloz i cili u servohet pacientëve në QKUK, e cila po udhëhiqet nga dostat e uzurpatorit të zyrës së Ministrit të Shëndetësisë, deputetit Arben Vitia,” thuhet në mesazhin e tij.
Infermieri Duraku ka shprehur indinjatë të thellë ndaj keqmenaxhimit dhe papërgjegjësisë institucionale, duke thënë se pacientët trajtohen në kushte që nuk përputhen as me standardet minimale të kujdesit shëndetësor. Ai kërkoi ndërhyrje urgjente dhe mbikëqyrje të pavarur për të siguruar trajtim të denjë për qytetarët që kërkojnë ndihmë në spitalin më të madh publik të vendit.
“Nuk është vetëm çështje ushqimi – është çështje dinjiteti, çështje shëndeti, dhe çështje jete. Ky është reflektim i një sistemi që ka neglizhuar njerëzit më të pambrojtur,” shkroi më tej ai.
