Kuvendi i Kosovës do të mblidhet sot në orën 11:00 për të vazhduar seancën konstituive, tashmë për herë të 42-të, në përpjekje për ta formuar strukturën e re parlamentare pas zgjedhjeve të fundit.
Seanca e fundit, e mbajtur dy ditë më parë, dështoi sërish të prodhojë rezultat, pasi nuk u arrit të formohet komisioni për votim të fshehtë – një hap kyç për zgjedhjen e kryesisë së Kuvendit. Në atë seancë, 54 deputetë morën pjesë në votim, pa asnjë votë kundër, por numri nuk mjaftoi për të kaluar fazën procedurale.
Kryesuesi i seancës, Avni Dehari, njoftoi se seanca do të vazhdojë më 5 korrik në të njëjtën orë, duke shpresuar në një marrëveshje ndërmjet grupeve parlamentare për të tejkaluar ngërçin institucional.
Përplasjet politike dhe mungesa e konsensusit mes partive të mëdha po e zvarrisin formimin e Kuvendit, duke ndikuar negativisht në funksionimin e institucioneve dhe në proceset e rëndësishme vendimmarrëse.
Qytetarët, shoqëria civile dhe faktori ndërkombëtar kanë shprehur shqetësimin për zvarritjen e këtij procesi, duke e konsideruar si një krizë të thellë të përfaqësimit dhe të demokracisë parlamentare në vend.
