Kryeministri izraelit Benjamin Netanyahu do të takohet me Presidentin e SHBA-së Donald Trump në Shtëpinë e Bardhë të hënën, ndërsa zyrtarët izraelitë zhvillojnë bisedime indirekte me Hamasin, që synojnë një marrëveshje për lirimin e pengjeve në Gaza dhe armëpushimin e ndërmjetësuar nga SHBA-të.
Trump tha të dielën se kishte një shans të mirë që një marrëveshje e tillë të arrihej këtë javë. Udhëheqësi izraelit i krahut të djathtë tha se besonte se diskutimet e tij me Trump do të ndihmonin në avancimin e bisedimeve që po zhvillohen në Katar.
Kjo do të jetë vizita e tretë e Netanyahut në Shtëpinë e Bardhë që kur Trump u rikthye në detyrë në janar dhe vjen pas urdhrit të Trump muajin e kaluar për sulme ajrore të SHBA-së kundër Iranit dhe një armëpushim pasues që i dha fund luftës 12-ditore Izrael-Iran.
Izraeli shpreson që lufta e tij 12-ditore me Iranin do të hapë rrugën për mundësi të reja diplomatike në rajon.
Avi Dichter, një ministër izraelit dhe anëtar i kabinetit të sigurisë së Netanyahut, tha se priste që takimi i Trump me udhëheqësin izraelit të shkonte përtej Gazës për të përfshirë mundësinë e normalizimit të marrëdhënieve me Libanin, Sirinë dhe Arabinë Saudite.
“Mendoj se para së gjithash do të përqendrohet në një term që e kemi përdorur shpesh, por që tani ka kuptim të vërtetë; një Lindje e Mesme e re”, i tha ai transmetuesit publik të Izraelit, Kan, të hënën.
