Ministri i Mbrojtjes në dorëheqje i Republikës së Kosovës, Ejup Maqedonci, ka pritur sot në takim zyrtar Kancelarin Federal dhe Ministrin e Mbrojtjes, Mbrojtjes Civile dhe Sportit të Zvicrës, z. Martin Pfister.
Gjatë takimit, ministri Maqedonci theksoi lidhjet e ngushta dhe të natyrshme ndërmjet Kosovës dhe Zvicrës, të ndërtuara mbi themelet e një komuniteti të fuqishëm të diasporës shqiptare që jeton e punon në Zvicër.
“Ekzistojnë lidhje të natyrshme mes Kosovës dhe Zvicrës falë diasporës tonë, e cila ka një ndikim të rëndësishëm në forcimin e marrëdhënieve tona dhe në zhvillimin e vendit. Për këtë arsye, bashkëpunimi bilateral ndërmjet shteteve tona është i pashmangshëm,” u shpreh ministri në dorëheqje, Maqedonci.
Në takim u diskutua thellësisht për rritjen e bashkëpunimit në fushën e mbrojtjes, me fokus të veçantë në trajnimin dhe edukimin e ushtarakëve, duke e vlerësuar këtë si një hap kyç në ngritjen e kapaciteteve të Forcës së Sigurisë së Kosovës (FSK).
Ministri në dorëheqje, Maqedonci informoi homologun zviceran për të arriturat e FSK-së ndër vite, duke theksuar nevojën për integrimin e Republikës së Kosovës në Bashkimin Evropian dhe NATO, si garanci për stabilitetin dhe sigurinë në rajonin e Ballkanit Perëndimor.
Të dy ministrat u dakorduan për thellimin e bashkëpunimit në fusha me interes të përbashkët dhe për fuqizimin e mëtejmë të marrëdhënieve dypalëshe.
“Faleminderit Zvicrës për mbështetjen dhe besimin. Së bashku po ecim drejt një të ardhme më të sigurt,” përfundoi ministri në dorëheqje, Maqedonci.
