Nëse dikush ka menduar se Zafir Berisha do ta linte politikën, është gabuar rëndë! Zafa, siç e njeh populli, ka hedhur tjera akuza politike ndaj Albin Kurtit, duke e akuzuar se jo vetëm që po i hap rrugë Serbisë, por se është bërë argat zyrtar i saj. Po, sipas Zafir Berishës, Albini “po e kthen Serbinë në Kosovë – për momentin në raftet e marketeve”.
Në një postim që tingëllon si mallë për Kadri Veselin dhe mllef të vjetër ndaj Kurtit, Zafa kombinon shifrat e importit nga Serbia deri te parashikimet e Kadri Veselit kur kishte thënë se Albini punon për rikthimin e Serbisë. Në stilin e tij karakteristik, Zafa na kujton me mall se “rahmet për së gjalli” duhet t’i themi Kadri Veselit që paska pasur “vizionin” për Albini-n, i cili, sipas tij, po e rikthen Serbinë jo me ushtri, por me euro-paleta të plotë keksa e detergjentë.
Zafa është bazuar në raportin e AKB-së për të denoncuar rritjen e importit nga Serbia me 118%. Dhe sipas tij, kjo nuk është ekonomi, është “okupim ekonomik”. Ndërkohë që qytetarët i blejnë këto produkte në mungesë të alternativave më të lira vendore, Zafa e sheh këtë si plan tinëzar për t’i dhënë Serbisë të drejtën e raftit të parë.
Por ndoshta pyetja më ekzistenciale që Zafa na lë pas këtij postimi është:
“A u ngit Albin a jo!?”
Zafir Berisha mbetet zëri kritik në korin opozitar – megjithëse një zë që flet më shumë për të kaluarën se për të ardhmen, dhe më shumë me mllef se me ide.
