Një zbulim i ri i bujshëm ka dalë në dritë mbi mënyrën se si është zhvilluar komunikimi mes Nazim Bllacës, një personazh kontravers i lidhur më herët me Shërbimin Informativ Serb (BIA), dhe Zdenka Pomper, koordinatore e hetimeve në Prokurorinë e Specializuar të Hagës. Komunikimet, të zbuluara nga RTV Dukagjini, hedhin dritë mbi bashkëpunime të dyshimta dhe burime të kontestuara për hetime që përfshijnë figurat kryesore të UÇK-së.
Pomper, e cila më parë ka shërbyer si hetuese në EULEX gjatë misionit të saj në Kosovë, del se ka mbajtur kontakte të vazhdueshme me Bllacën, duke shkëmbyer informacione dhe materiale që ngrejnë pikëpyetje serioze për integritetin e hetimeve në Hagë.
Në një nga email-et e publikuara, Bllaca informon Pomperin për vdekjet dhe kërcënimet ndaj dëshmitarëve në rastet e Fatmir Limajt dhe Ramush Haradinajt, duke deklaruar se dëshmitarëve u ishte bërë presion të mos shkonin në Tribunalin e Hagës. Ai përmend rastin e Agim Zogajt, dëshmitar kyç në çështjen Limaj, i cili u gjet i vdekur në rrethana të dyshimta në Gjermani.
Pomper i përgjigjet me një pyetje të drejtpërdrejtë:
“A ka pasur hetim special për të gjitha këto gjëra?”
Vetëm pesë minuta më vonë, ajo i dërgon Bllacës një link i cili tashmë është i pavlefshëm, por që Bllaca e kishte ruajtur në laptopin e tij. Sipas burimeve të gazetarit Ermal Panduri, linku përmbante raporte serbe, që flisnin për vrasjen e 16 dëshmitarëve të përfshirë në rastet Limaj e Haradinaj – një burim i qartë propagandistik kundër UÇK-së.
Në një tjetër email, Bllaca i dërgon Pomperit fotografi, për të cilat ajo e falënderon:
“Faleminderit, gjithmonë kam pyetur veten nëse dikush ka hetuar aksidentet, vrasjet e dëshmitarëve në rastin Limaj dhe Haradinaj.”
Në komunikimet në vazhdim, Bllaca shfaq shqetësime serioze për sigurinë dhe dekonspirimin e dëshmive të tij, duke pohuar se një deklaratë që ishte ndarë vetëm mes katër personave, kishte rrjedhur jashtë. Ai akuzon strukturat e brendshme të EULEX-it për rrjedhje informacioni dhe frikësohet se është ekspozuar si informator.
Në email-et e tjera, Bllaca shprehet me shqetësim edhe për figura të njohura si Sami Lushtaku dhe Sabit Geci, duke lënë të kuptohet se kishte interesa të caktuara përfshirë në çështjet e tij.
Zdenka Pomper, e cila është një prej figurave kryesore të Prokurorisë Speciale në Hagë, ka shërbyer edhe si dëshmitare në procesin kundër Nasim Haradinajt dhe Hysni Gucatit, dy prej zyrtarëve të ish-Organizatës së Veteranëve të Luftës, të akuzuar për publikimin e dokumenteve konfidenciale nga Dhomat e Specializuara.
Publikimi i këtyre komunikimeve ka hapur një debat të gjerë në opinionin publik në Kosovë, duke ngritur pyetje serioze për burimet, standardet dhe paanshmërinë e hetimeve të Hagës, në një kohë kur proceset ndaj ish-krerëve të UÇK-së janë në kulmin e tyre. Skandali mund të ketë pasoja të rënda mbi kredibilitetin e drejtësisë ndërkombëtare dhe rolin e saj në adresimin e krimeve të luftës në Kosovë.
