Komandanti i stacionit të policisë në Lipjan, Argjend Gashi, ka dhënë dorëheqje nga funksioni i tij, pas vdekjes tragjike të 27-vjeçarit Agon Zejnullahu më 7 korrik, në rrethana ende të paqarta gjatë një ndërhyrjeje policore. Lajmi është konfirmuar nga vetë Gashi në një deklaratë për mediat, ku ai thekson se bëhet fjalë për një “dorëheqje morale”, ndërsa nënvizon se nuk është shkarkuar dhe pret të emërohet në një funksion tjetër brenda Policisë së Kosovës.
“E vërtetë është që kam ofruar dorëheqje morale. Ende nuk ka vendim të ri, por pres që sot të caktohem në një pozitë tjetër,” deklaroi Gashi për Klan Kosova.
Ndërkohë, pesë zyrtarë policorë të Lipjanit janë arrestuar dhe ndodhen në paraburgim me masën e arrestit njëmujor, nën dyshimin për veprën penale “vrasje nga pakujdesia”. Ata janë pezulluar menjëherë nga detyra, ndërsa Prokuroria ka nisur hetimet për vdekjen e Zejnullahut, i cili ndërroi jetë menjëherë pas një përballjeje me forcat policore.
Sipas njoftimit të Policisë së Kosovës, viktima kishte qenë nën ndikimin e alkoolit dhe kishte treguar sjellje të dhunshme ndaj automjeteve dhe kalimtarëve në qendër të qytetit. Gjatë ndërhyrjes, u përdor spraj lotsjellës dhe policët tentuan ta shoqërojnë. Pak momente më vonë, ai humbi ndjenjat, dhe kur mbërriti ndihma e shpejtë, ishte tashmë i pajetë.
Pamjet video të publikuara në media tregojnë Zejnullahun të gjunjëzuar me duar të lidhura, pak para se të futej në autoambulancë.
Obduksioni është kryer në Institutin e Mjekësisë Ligjore në Prishtinë. Edhe pse nuk janë dhënë të dhëna zyrtare, raportime nga Radio Evropa e Lirë citojnë burime që flasin për shenja të mundshme mbytjeje si shkak i vdekjes.
Familja e Agon Zejnullahut ka shprehur zemërim dhe zhgënjim për mungesën e transparencës dhe informacionit zyrtar, duke pohuar se në trupin e të ndjerit janë vërejtur mavijosje dhe fraktura.
Një protestë paqësore u mbajt dje në sheshin qendror të Lipjanit, ku dhjetëra të rinj u mblodhën për të nderuar kujtimin e Agonit dhe për të kërkuar drejtësi. Në shesh u vendosën fotografi të tij me mbishkrimin “Drejtësi për Agonin”, disa prej të cilave u lyen me ngjyrë të kuqe, si simbol i dhimbjes dhe revoltës.
Protestuesit kërkuan një proces të drejtë gjyqësor dhe ndëshkim të të gjithë atyre që kanë pasur përgjegjësi në rastin që ka tronditur opinionin publik në Kosovë.
Rasti i Agon Zejnullahu ka hapur debat të gjerë mbi përdorimin e forcës nga ana e policisë, transparencën institucionale dhe nevojën për mbikëqyrje më të rreptë të veprimeve të forcave të rendit. Kjo ngjarje, përveçse tragjike, mund të shërbejë si nxitje për reforma të thelluara në sistemin e drejtësisë dhe të sigurisë në Kosovë.
