Pjesëmarrësit në një konferencë në Romë mbi rimëkëmbjen ekonomike të Ukrainës kanë premtuar mbi 10 miliardë euro (11.7 miliardë dollarë) për të ndihmuar vendin e shkatërruar nga lufta, tha të enjten kryeministrja italiane Giorgia Meloni.
Konferenca, në të cilën marrin pjesë udhëheqës politikë, përfshirë Presidentin e Ukrainës Volodymyr Zelenskiy, po zhvillohet në një sfond sulmesh të mëtejshme intensive me dronë dhe raketa ndaj Kievit.
Duke folur në hapje të konferencës, Zelenskiy i përshkroi sulmet si “terrorizëm të pastër”.
Meloni dhe kancelari gjerman Friedrich Merz përmendën rimëkëmbjen e vendeve të tyre nga rrënojat e Luftës së Dytë Botërore si një shembull të asaj që mund të arrinte Ukraina.
“Mendoj se duhet të jemi krenarë për rezultatin që kemi arritur së bashku sot – kombet, organizatat ndërkombëtare, institucionet financiare, autoritetet lokale, sektori i biznesit dhe shoqëria civile”, tha Meloni në fjalën e saj hapëse në konferencë.
“Së bashku, në konferencën e sotme, kemi marrë angazhime që arrijnë në total mbi 10 miliardë euro”, shtoi ajo.
Konferenca që Italia po organizon është ngjarja e katërt e tillë që kur Rusia pushtoi fqinjin e saj në shkurt 2022 dhe synon kryesisht mobilizimin e mbështetjes ndërkombëtare për Ukrainën.
