Presidentja e Kosovës, Vjosa Osmani, ka deklaruar se ka “informacione të besueshme” se presidenti amerikan Donald Trump ka luajtur një rol kyç në parandalimin e një përshkallëzimi të mundshëm të situatës së sigurisë nga Serbia ndaj Kosovës, gjatë këtij viti.
Gjatë një ligjërate në një forum në Uashington, Osmani theksoi se ky veprim i Trump-it ka ndodhur “së voni”, duke nënvizuar se nuk bëhet fjalë për ngjarjet e vitit të kaluar, si sulmi i armatosur në Banjskë në shtator 2023.
“Nuk po flasim për vitin 2023,” theksoi Osmani. “Meqë ka ndodhur më parë, parandalimi është kyç. Nuk mund ta mohojmë mundësinë, sepse ka ndodhur më parë.”
Presidentja nuk dha detaje të mëtejshme rreth rrethanave apo mënyrës së ndërhyrjes amerikane, por u shpreh e bindur se angazhimi personal i Trump-it dhe ndikimi i SHBA-së kanë qenë vendimtarë në shmangien e një konflikti të mundshëm në rajon.
Kujtojmë se Donald Trump, gjatë mandatit të tij të parë si president, ndërmjetësoi Marrëveshjen e Uashingtonit më shtator 2020, e cila u nënshkrua në praninë e tij mes Kosovës dhe Serbisë dhe kishte në fokus normalizimin ekonomik mes dy vendeve. Marrëveshja përfshinte gjithashtu njohjen e ndërsjellë mes Kosovës dhe Izraelit — një zhvillim i rëndësishëm në diplomacinë kosovare.
Megjithatë, shumë nga zotimet e asaj marrëveshjeje mbetën të pazbatuara, ndërsa tensionet në veri të Kosovës kanë vazhduar sporadikisht edhe në vitet pasuese.
Deklarata e Osmanit u dha në një moment kur çështja e sigurisë në Ballkan mbetet në vëmendje të aleatëve perëndimorë, ndërsa përpjekjet për anëtarësimin e Kosovës në NATO dhe organizata të tjera ndërkombëtare janë intensifikuar.
