Tre komandantë stacionesh të Policisë së Kosovës janë shkarkuar nga detyra, mëson “Betimi për Drejtësi”. Bëhet fjalë për komandantin e Policisë në Pejë, Idriz Atashi; komandantin në Suharekë, Afrim Sylaj; dhe komandantin në Klinë, Ragip Bytyqi.
Vendimet janë dorëzuar sot dhe pritet që komandantët e rinj të emërohen në ditët në vijim. Deri tani, nuk ka informacione zyrtare mbi emrat e zëvendësuesve.
“Betimi për Drejtësi” ka kontaktuar komandantët e shkarkuar, por ata nuk kanë qenë të qasshëm për koment. Po ashtu, nuk ka pasur përgjigje nga ministri në detyrë i MPB-së, Xhelal Sveçla, dhe drejtori i Policisë së Kosovës, Gazmend Hoxha, pavarësisht përpjekjeve për t’i kontaktuar.
Burime të afërta thonë se shkarkimet lidhen me zhvillimet e fundit në komunat përkatëse, por detaje konkrete nuk janë bërë publike ende.
