Në një deklaratë me peshë të madhe diplomatike, Ambasadorja e Shteteve të Bashkuara në Organizatën e Kombeve të Bashkuara, Dorothy Shea, ka kërkuar zyrtarisht mbylljen e misionit të UNMIK-ut në Kosovë, duke theksuar se “koha për ta përfunduar këtë mision është tani”.
Kjo deklaratë u bë publike pas takimit të saj me Presidenten e Kosovës, Vjosa Osmani, gjatë qëndrimit të kësaj të fundit në SHBA. Në një postim në platformën “X”, ambasadorja Shea theksoi se Shtetet e Bashkuara e konsiderojnë Kosovën si një partner të ngushtë strategjik dhe mbeten të përkushtuara fuqimisht për të çuar përpara njohjen e saj të plotë brenda Kombeve të Bashkuara.
“Koha për të mbyllur UNMIK-un, misionin e OKB-së, është tani”, deklaroi Ambasadorja Shea, duke sinjalizuar një kthesë të re në qëndrimin amerikan për praninë ndërkombëtare në Kosovë.
Gjatë vizitës në Uashington, Presidentja Osmani zhvilloi takime edhe me zëvendëssekretarin amerikan të Shtetit, Christopher Landau, si dhe me senatorin Andy Kim, ku në fokus të bisedimeve ishte forcimi i partneritetit strategjik ndërmjet Kosovës dhe SHBA-së, përshpejtimi i integrimit ndërkombëtar të vendit, dhe përkrahja për paqen dhe stabilitetin në Ballkan.
Misioni i Kombeve të Bashkuara në Kosovë (UNMIK) është aktiv që nga viti 1999 dhe operon në bazë të Rezolutës 1244 të Këshillit të Sigurimit. Për vite me radhë, Prishtina ka kërkuar rishikimin ose mbylljen e mandatit të UNMIK-ut, duke argumentuar se realiteti politik në Kosovë ka ndryshuar rrënjësisht, veçanërisht pas shpalljes së pavarësisë në vitin 2008.
Mbështetja e hapur e SHBA-së për mbylljen e këtij misioni shihet si një hap i rëndësishëm diplomatik në drejtim të forcimit të subjektivitetit ndërkombëtar të Kosovës, si dhe një sinjal i qartë për vendet që ende nuk e kanë njohur pavarësinë e saj.
Një qëndrim i tillë nga SHBA mund të nxisë debate të reja në Këshillin e Sigurimit të OKB-së, ku vende si Rusia dhe Kina vazhdojnë të kundërshtojnë njohjen e Kosovës. Megjithatë, presioni diplomatik nga aleatët perëndimorë, përfshirë Shtetet e Bashkuara dhe shumicën e vendeve anëtare të BE-së, mund të krijojë një momentum të ri për avancimin e pozitës ndërkombëtare të Kosovës.
