Prishtinë, 15 Korrik 2025 – Gjykata Supreme e Kosovës ka hedhur poshtë Udhëzimin Administrativ të Ministrisë së Financave që parashihte kalimin e obligueshëm nga përdorimi i arkave fiskale hardverike në ato digjitale, një vendim që ka ngjallur reagime të ashpra nga ministri në detyrë, Hekuran Murati.
Vendimi i Supremes, i marrë nga gjyqtarët Delushe Halimi, Lumni Sallauka dhe Franciska Zhitija-Ymeri, vlerëson se udhëzimi i miratuar nga ministria ishte në kundërshtim me legjislacionin në fuqi. Si rrjedhojë, procesi i planifikuar i digjitalizimit të arkave fiskale pezullohet deri në një vendim të ri ligjor apo ndryshim të bazës ligjore.
Ministri në detyrë Hekuran Murati ka reaguar përmes një postimi publik, duke e cilësuar këtë vendim si “absurd dhe dëmtues për bizneset”, duke akuzuar sistemin gjyqësor se po pengon modernizimin dhe po mban të gjallë një model monopolistik të arkave fiskale me kosto të lartë.
“Monopoli i arkave fiskale me kosto enorme për bizneset tatimpaguese, i vendosur në kohën kur Bedri Hamza kishte qenë Ministër i Financave, parashihej të merrte fund me Udhëzimin e Ri Administrativ… Mirëpo sot Gjykata Supreme vendosi që ai të shfuqizohet,” – shkroi Murati.
Sipas tij, ky vendim do t’i kushtojë bizneseve mbi 5 milionë euro në vit, pasi ato do të detyrohen të vazhdojnë të përdorin sistemet e vjetra, që sipas ministrisë janë më të shtrenjta dhe më pak efikase.
Murati kishte promovuar zëvendësimin e arkave fiskale fizike me zgjidhje softuerike të integruara, duke ndjekur modelin e aplikuar tashmë në shumë shtete të rajonit dhe Evropës. Sipas tij, ky proces do të ulte kostot për bizneset, do të rritte transparencën fiskale dhe do të mundësonte mbledhje më efikase të të hyrave buxhetore.
Megjithatë, vendimi i Supremes rihap debatin për balancën mes reformave të shpejta digjitale dhe sigurisë ligjore në vendimmarrjen ekzekutive.
Pritet që ministria në të ardhmen të kërkojë rrugë ligjore alternative për të avancuar procesin e digjitalizimit në sektorin fiskal, ndërsa komuniteti i bizneseve dhe organizatat e ekonomisë presin që ato të konsultohen nga ministria kur planifikohen këto ndryshime.
