Sot, Kuvendi i Kosovës do të tentojë për herë të 47-të të konstituohet, në një seancë që pritet të fillojë në orën 11:00. Deputetët do të mblidhen edhe një herë për të tentuar zgjedhjen e kryetarit dhe kryesisë së Kuvendit, një proces që deri më tani ka dështuar për shkak të mungesës së konsensusit politik.
Në seancën e fundit, përpjekja për të formuar komisionin që do të organizonte votimin e fshehtë për kryetarin e Kuvendit dështoi, pasi propozimi nuk mori mbështetjen e mjaftueshme të deputetëve. Edhe pse pati 43 vota për, ato nuk ishin të mjaftueshme për të kaluar sipas rregullores parlamentare, duke çuar në ndërprerjen e seancës.
Kryesuesi Avni Dehari njoftoi atëherë se seanca e radhës do të mbahet më 15 korrik, për të respektuar afatin kushtetues. Sipas vendimit të Gjykatës Kushtetuese, Kuvendi duhet të konstituohet brenda 30 ditëve nga seanca e tij e parë, duke rritur presionin mbi spektrin politik për të gjetur një zgjidhje.
Pas dështimit të fundit, partitë e ish-opozitës qëndruan në sallë për të zhvilluar biseda nga ku edhe i bënë thirrje Lëvizjes Vetëvendosje që të reflektojë, duke kërkuar një zgjidhje konsensuale për të shmangur një krizë të mëtejshme institucionale.
Sytë sot janë të drejtuar nga kjo seancë e 47-të – një tjetër përpjekje kyçe për të zhbllokuar funksionimin institucional të Kuvendit dhe për të rivendosur normalitetin politik në vend.
