Serbia dhe Kina do të zhvillojnë për herë të parë në histori një stërvitje të përbashkët ushtarake, duke shënuar një moment të ri në bashkëpunimin strategjik mes dy vendeve. Lajmi u bë i ditur të hënën nga Ministria e Mbrojtjes e Kinës.
Stërvitja me emrin “Paqeruajtësit 2025” do të mbahet në fund të muajit korrik në provincën Hebei, në Kinën veriore, dhe do të përfshijë njësi të forcave speciale nga të dyja vendet. Zëdhënësi i ministrisë kineze, kolonel Jiang Bin, theksoi se kjo është stërvitja e parë e këtij lloji mes ushtrisë kineze dhe asaj serbe.
“Ky ushtrim synon të forcojë aftësitë luftarake të pjesëmarrësve dhe të thellojë bashkëpunimin mes dy ushtrive,” deklaroi kolonel Jiang në një konferencë për media.
Serbia, që ruan një pozicion ushtarakisht neutral dhe është anëtare e programit “Partneriteti për Paqe” të NATO-s, ka thelluar vitet e fundit marrëdhëniet me Kinën, të cilat i cilëson si “partneritet strategjik”.
Kina, përmes investimeve miliardëshe dhe mbështetjes në forume ndërkombëtare, ka konsoliduar rolin e saj si një partner kyç për Beogradin, veçanërisht në kundërshtimin e pavarësisë së Kosovës në organizatat ndërkombëtare.
Kjo stërvitje e përbashkët ushtarake vjen në një kontekst gjeopolitik kompleks, ku Serbia përpiqet të ruajë një ekuilibër mes aspiratave për anëtarësim në Bashkimin Evropian dhe aleancave të ngushta me aktorë si Kina dhe Rusia.
Analistët vlerësojnë se bashkëpunime të tilla ushtarake janë pjesë e strategjisë afatgjatë të Serbisë për të forcuar pozitën e saj ndërkombëtare përmes diversifikimit të partnerëve në siguri dhe zhvillim. Ndërkohë, për Kinën, kjo është një tjetër hap në përpjekjet për të zgjeruar ndikimin e saj në rajonin e Ballkanit.
