Të paktën një person ka humbur jetën dhe 18 të tjerë janë plagosur si pasojë e një serie sulmesh ajrore të ushtrisë izraelite në Damask, kryeqytetin e Sirisë, të mërkurën, njoftoi Ministria siriane e Shëndetësisë.
Agjencia shtetërore siriane e lajmeve, SANA, raportoi se avionë luftarakë izraelitë shënjestruan ndërtesën e Shtabit të Përgjithshëm të Ushtrisë dhe Pallatin Presidencial, të njohur si Qasr al-Shaab, në qendër të qytetit.
Radioja Ushtarake e Izraelit konfirmoi se një “sulm paralajmërues” u krye pranë Pallatit Presidencial, ndërkohë që video të shpërndara në rrjete sociale tregojnë momente të sulmeve dhe re të mëdha tymi që ngrihen nga zona të ndryshme të Damaskut.
Ministri izraelit i Mbrojtjes, Israel Katz, deklaroi se “goditjet e dhimbshme kanë filluar”, duke shpërndarë një video të një transmetimi të kanalit shtetëror sirian SyriaTV, ku një shpërthim i fuqishëm ndërpret transmetimin direkt.
Sipas transmetuesit publik izraelit KAN, ushtria izraelite ka kryer gati 160 sulme ajrore në territorin sirian që nga mbrëmja e kaluar, shumica e të cilave në qytetin jugor të Suwayda. KAN shton se shefi i shtabit të ushtrisë izraelite, Eyal Zamir, ka urdhëruar zhvendosjen e forcave nga Gaza drejt Lartësive Golan të pushtuara nga Izraeli.
Sulmet vijnë në një kohë tensionesh të larta në jug të Sirisë, ku ushtria siriane është vendosur për të rivendosur rendin dhe për të mbrojtur civilët pas përplasjeve të armatosura mes grupeve druze dhe beduine që lanë të paktën 30 të vdekur.
Ministria e Jashtme siriane e ka quajtur sulmin një “shkelje flagrante të sovranitetit” dhe ka kërkuar reagim urgjent nga komuniteti ndërkombëtar.
