Në bazën ushtarake “Camp Villaggio Italia” në Pejë u mbajt ceremonia e ndarjes së medaljeve për ushtarët e kontingjentit italian që shërbejnë në misionin e NATO-s, KFOR.
Ceremonia u udhëhoq nga komandanti i Komandës Rajonale Perëndim (RC-W), koloneli Francesco Errico, i cili dekoroi pjesëtarët e kontingjentit me Medaljen e NATO-s për profesionalizëm dhe përkushtim në shërbim.
Kolonel Errico shprehu mirënjohjen e tij të thellë ndaj ushtarëve të nderuar, duke theksuar rolin e rëndësishëm të tyre në mbështetjen e paqes dhe sigurisë në Kosovë.
“KFOR vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një ambient të sigurt dhe të qëndrueshëm për të gjithë njerëzit dhe komunitetet që jetojnë në Kosovë dhe për lirinë e lëvizjes, në çdo kohë dhe në mënyrë të paanshme,” thuhet në komunikatën e KFOR-it.
KFOR thekson se operacionet i zhvillon në bashkëpunim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në kuadër të mekanizmit të reaguesve të sigurisë.
