Gjykata e Apelit e Kosovës ka miratuar ankesën e Komunës së Prishtinës në lidhje me çështjen e transformimit të rrugës “Xhorxh Bush” në shesh publik për këmbësorë, duke anuluar vendimin e mëparshëm të Gjykatës Themelore dhe duke e kthyer çështjen për rishqyrtim.
Ky vendim përbën një fitore të rëndësishme për institucionet komunale dhe një hap përpara drejt zhvillimit të qëndrueshëm urban në kryeqytet.
“Vendimi i ri vërteton se kemi vepruar në përputhje me ligjin dhe interesin publik. Qendrat urbane nuk ndërtohen mbi ndotje dhe zhurmë, por mbi parimin që qyteti i takon këmbësorëve,” thuhet në reagimin zyrtar të Komunës.
Transformimi i rrugës “Xhorxh Bush” në një hapësirë për qytetarët është pjesë e një strategjie afatgjatë për zhvillimin urban të Prishtinës, në harmoni me standardet e Bashkimit Evropian dhe praktikat më të mira të qyteteve moderne.
Reduktimi i ndotjes nga PM10 dhe NO2 nuk është luks – është domosdoshmëri për shëndetin publik. Hapja e qytetit për këmbësorët është masë sigurie dhe nxit barazinë sociale. Zhvillimi i hapësirave publike është standard urban, jo eksperiment.
Nga Komuna theksojnë se ky proces nuk është një vendim momental, por një përkushtim serioz për cilësinë e jetës së qytetarëve dhe mbrojtjen e mjedisit.
“Ata që i frikësohen një Prishtine të hapur për të gjithë, do të kuptojnë se koha e bllokadave të jashtligjshme po përfundon,” thuhet në fund të deklaratës.
