Edhe pse ka diell të bollshëm gjatë vitit, një fenomen i pazakontë po ndodh: njerëzit vuajnë nga mungesa e vitaminës D, një element thelbësor për shëndetin tonë.
Në kulmin e sezonit veror, kur shumë prej nesh i drejtohen hapësirave të hapura dhe plazheve, ekspertët e shëndetit paralajmërojnë për rëndësinë e ekspozimit të rregullt në diell. Vitamina D sintetizohet kryesisht përmes kontaktit të lëkurës me rrezet ultravjollcë dhe është e domosdoshme për mirëfunksionimin e sistemit imunitar, forcimin e kockave dhe mbrojtjen ndaj sëmundjeve kronike.
Mjeku endokrinolog Dashamir Gjergji thekson se dielli i fortë është i domosdoshëm për prodhimin optimal të vitaminës D. “Sa më intensiv të jetë dielli, aq më efikase është sintetizimi i vitaminës D në lëkurë,” shpjegon ai. Megjithatë, paralajmëron që ekspozimi duhet të jetë i matur, veçanërisht për personat me sëmundje kronike.
Një aspekt që po debatohet shumë është përdorimi i kremrave mbrojtës nga dielli. Mjekët endokrinologë shpesh janë në kundërshtim me dermatologët, duke argumentuar se kremrat kundër diellit pengojnë sintezën natyrale të vitaminës D. “Kremrat mbrojtës ndërpresin kaskadën natyrale të formimit të vitaminës D,” shpjegon ai, duke shtuar se nxirja natyrale siguron një mbrojtje më të qëndrueshme dhe më të shëndetshme për lëkurën.
Gjergji rekomandon që ekspozimi në diell të bëhet kryesisht gjatë orëve të pasdites, përpara perëndimit, kur rrezet janë më të buta, por akoma efektive. “Orët e pasdites janë ideale, sepse rrezet e diellit jo vetëm na ndihmojnë të nxijmë natyralisht, por gjithashtu kanë një efekt mbrojtës kundër shumë sëmundjeve kronike.”
Vitamina D është një antioksidant i fuqishëm që ndihmon në mbrojtjen kundër kancerit, përmirëson imunitetin dhe zvogëlon rrezikun e sëmundjeve të ndryshme. Prandaj, edhe në vende me diell të bollshëm, është e rëndësishme të kujdesemi që të ekspozohemi mjaftueshëm në diell për të mbajtur nivelet e vitaminës D në organizëm në balancë.
Në fund, ekuilibri mes mbrojtjes dhe ekspozimit të drejtë në diell është kyç për shëndetin tonë afatgjatë.
