Një ngjarje tragjike është regjistruar pasditen e sotme në shëtitoren e plazhit të Shëngjinit, ku një 32-vjeçar ka humbur jetën gjatë punës.
Viktima është identifikuar si Z. L., banues në fshatin Mërqi të Lezhës.
Sipas informacioneve paraprake nga policia, rreth orës 16:45, i riu dyshohet se ka rënë në kontakt me rrymën elektrike teksa punonte në një skelë pranë bustit “Willson”. Për pasojë, ai ka humbur ekuilibrin, ka rënë nga lartësia dhe ka ndërruar jetë në vendngjarje.
Menjëherë pas incidentit, në vendin e ngjarjes kanë mbërritur forcat e policisë dhe grupi hetimor, të cilët po punojnë për sqarimin e plotë të rrethanave.
Ende nuk ka detaje zyrtare mbi shkaqet e mundshme të incidentit, ndërsa autoritetet pritet të dalin me një njoftim më të detajuar pas përfundimit të hetimeve paraprake.
