Presidenti ukrainas Volodymyr Zelensky ka njoftuar se të mërkurën do të zhvillohet një raund i ri bisedimesh për paqen mes Ukrainës dhe Rusisë, pas dy raundeve të mëparshme që nuk sollën përparim të dukshëm.
Takimi do të mbahet në Stamboll, njësoj si negociatat e muajve maj dhe qershor, të cilat përfunduan pa rezultate konkrete. Lajmi është konfirmuar edhe nga një zëdhënës i qeverisë turke.
Ndërkohë, lufta në Ukrainë ka hyrë në ditën e saj të 1245-të, me sulme të reja ajrore nga Rusia, që kanë shkaktuar dy të vdekur dhe 15 të plagosur. Sulmet përfshinë dronë luftarakë dhe raketa hipersonike Kinzhal, duke goditur Kievin dhe disa rajone të tjera të vendit.
Ndërkohë, Pekini ka reaguar ndaj paketës së re të sanksioneve të Bashkimit Europian, që synojnë të kufizojnë kapacitetet ushtarake të Rusisë dhe përfshijnë edhe entitete kineze. Ministria kineze e Tregtisë i ka cilësuar masat si “të gabuara”.
