Mbrojtja e ish-presidentit Hashim Thaçi dhe ish-kryetarit të Kuvendit Jakup Krasniqi ka njoftuar planet e tyre për paraqitjen e provave në Gjykatën Speciale, ku pritet të thirren gjithsej 17 dëshmitarë, raporton “Betimi për Drejtësi”.
Avokati Luka Mishetiq, përfaqësues i mbrojtjes së Hashim Thaçit, deklaroi se 12 dëshmitarë pritet të paraqiten në këtë fazë të procesit, ndër të cilët 11 dëshmi do të zhvillohen në sallën e gjyqit, ndërsa një pritet të dëshmojë viva voce (drejtpërdrejt në gjykatë).
“Derisa tani jemi në gjendje të konfirmojmë tre dëshmitarë, presim që shumica e tjerëve të paraqiten sipas Rregullës 154, por kjo varet nga marrja e autorizimeve përkatëse. Dy dëshmitarë tashmë janë klasifikuar: një sipas Rregullës 154 dhe një tjetër sipas Rregullës 153”, u shpreh Mishetiq.
Nga ana tjetër, mbrojtja e Jakup Krasniqit, përfaqësuar nga avokati Aiden Ellis, ka bërë të ditur se do të thërrasë pesë dëshmitarë: dy sipas Rregullës 154, dy të tjerë sipas Rregullës 153 dhe një sipas Rregullës 155.
Mbrojtja e Thaçit gjithashtu ka njoftuar se është në pritje të autorizimit për 30 dokumente që do të paraqiten në përputhje me Rregullën 170, ndërsa mbrojtja e Krasniqit po përgatit pesë dokumente të tjera për të cilat ende nuk ka autorizim.
Mishetiq konfirmoi gjithashtu se deklaratat e parashikuara sipas Rregullës 145 janë dorëzuar tashmë në Zyrën e Prokurorit të Specializuar (ZPS).
Ky zhvillim paraqet një hap të rëndësishëm në fazën e mbrojtjes së të akuzuarve, ndërsa procesi në Dhomat e Specializuara të Kosovës në Hagë po vazhdon me dinamikë të shtuar në drejtim të përfundimit të paraqitjes së provave.
