Përballë temperaturave përvëluese që pritet të mbizotërojnë në vend gjatë periudhës 22 – 25 korrik 2025, Ministria e Shëndetësisë (MSh) ka dalë me një paketë rekomandimesh për institucionet publike dhe private, me qëllim mbrojtjen e shëndetit të punëtorëve.
Në njoftimin e publikuar, MSh bazohet në rekomandimet e Institutit Kombëtar të Shëndetësisë Publike të Kosovës (IKSHPK), duke theksuar se temperaturat e larta paraqesin rrezik të shtuar sidomos për grupet më të ndjeshme të popullsisë, si fëmijët, të moshuarit, gratë shtatzëna dhe personat me sëmundje kronike. Rreziku është edhe më i madh për punëtorët që ushtrojnë veprimtari në ambiente të hapura ose në hapësira pune me nxehtësi të lartë.
Një nga rekomandimet kryesore është “mundësia e punës nga shtëpia”, aty ku natyra e punës e lejon. Po ashtu, institucionet ftohen të aplikojnë orare më të lehtësuara ose fleksibile, si dhe të shmangin punën fizike në kulmin e vapës, në mënyrë që të reduktohet ekspozimi ndaj rrezeve të diellit dhe të shmangen rastet e goditjes nga nxehtësia.
MSh i bën thirrje të gjitha institucioneve të respektojnë me përpikëri këto masa, duke theksuar se shëndeti dhe siguria e punëtorëve duhet të jenë prioritet gjatë kësaj vale të të nxehtit ekstrem. Ajo nënvizon se ndërgjegjësimi dhe veprimi i shpejtë në raste të tilla është thelbësor për të shmangur pasojat serioze për shëndetin publik.
Ky reagim vjen në një kohë kur temperaturat në Kosovë pritet të kalojnë mbi 38°C, duke shtuar shqetësimin për mirëqenien e qytetarëve dhe nevojën për kujdes të shtuar, veçanërisht gjatë orëve të mesditës.
