Telefonat inteligjente- smartfonët janë kthyer në pjesë të pandashme të jetës sonë – na ndihmojnë të komunikojmë, punojmë, mësojmë e madje edhe të relaksohemi.
Por a e kemi menduar ndonjëherë se çfarë ndikimi kanë ata në trurin tonë?
Studimet më të fundit tregojnë se përdorimi i tepërt i smartfonëve mund të dëmtojë seriozisht shëndetin e trurit, veçanërisht neuronet – qelizat që ndihmojnë në përpunimin e informacionit dhe kujtesën.
Çfarë po ndodh me trurin tonë?
Ekspertët kanë zbuluar se ekspozimi i gjatë ndaj dritës blu që lëshon ekrani i telefonit (sidomos gjatë natës), ndikon te gjumi. Kur nuk flemë mirë, truri nuk ka kohë të rikuperohet dhe kjo mund të dëmtojë funksionimin e tij.
Përveç kësaj, përdorimi i shpeshtë i smartfonit çrregullon sistemin e shpërblimit të trurit. Kur marrim njoftime, pëlqime apo mesazhe, truri ynë prodhon dopaminë – një kimikat që na bën të ndihemi mirë. Por me kalimin e kohës, truri fillon të kërkojë gjithnjë e më shumë stimuj, duke krijuar një varësi që ndikon negativisht në përqendrim dhe kujtesë.
Kush është më i rrezikuar?
Të rinjtë dhe fëmijët janë më të ndjeshëm ndaj këtyre efekteve. Truri i tyre është ende në zhvillim dhe përdorimi i tepërt i telefonit mund të ndikojë në mënyrën si ata mësojnë, kujtojnë dhe përqendrohen.
Po ashtu, janë vënë re rritje të ndjeshme të stresit, ankthit dhe madje edhe depresionit.
Si mund të mbrohemi?
Ja disa këshilla të thjeshta për të mbajtur trurin të shëndetshëm:
Kufizo përdorimin e telefonit, sidomos para gjumit
Përdor opsionin “dritë nate” për të zvogëluar dritën blu
Bëj pushime gjatë përdorimit të ekranit
Kalon më shumë kohë jashtë, në natyrë
Bëj aktivitete fizike dhe shoqërore, larg ekranit
Pra, smartfonët janë të dobishëm, por si çdo gjë në jetë, edhe ata duhen përdorur me masë. Truri është një organ i ndjeshëm dhe ka nevojë për pushim, gjumë cilësor dhe aktivitete që e mbajnë aktiv në mënyrë natyrale. Kujdesu për të – do ta ndjesh ndryshimin!
