Tre shtetas britanikë, prej të cilëve dy nga Kosova, dyshohen për përdhunimin e një 28-vjeçareje të martën në një hotel në Split të Kroacisë.
Gjykatësi hetues i Gjykatës së Qarkut në Split ka caktuar një muaj paraburgim të treve, raporton HRT, mediumi publik kroat.
Përdhunimi u raportua në polici pak pasi ndodhi, dhe në vendin e ngjarjes u gjet njëri nga tre të dyshuarit, ndërsa së shpejti u arrestuan edhe dy të tjerët, të cilët u dërguan për hetim kriminalistik në polici.
Për të tre është propozuar paraburgimi hetimor për shkak të mundësisë së arratisjes, gjë që gjykatësi e ka pranuar.
Vepra penale është kryer në dhomën e hotelit
Ata akuzohen për vepër të rëndë penale kundër lirisë seksuale, dhe vepra penale është kryer të martën ndërmjet orës 5 dhe 7:30 të mëngjesit në një dhomë hoteli buzë detit, pas së cilës viktima e ka raportuar menjëherë rastin në polici.
Sipas kodit penal, për këtë vepër penale mund të shqiptohet dënim nga minimumi gjashtë muaj deri në maksimumi dhjetë vjet burgim
