Deputeti i Lidhjes Demokratike të Kosovës (LDK), Armend Zemaj, ka deklaruar se Lëvizja Vetëvendosje (VV) nuk është e interesuar realisht për konstituimin e Kuvendit, por se problemi i vërtetë qëndron tek mungesa e numrave për formimin e Qeverisë. Këto komente Zemaj i bëri për media, pak para fillimit të seancës konstituive të Kuvendit të Kosovës.
Zemaj komentoi edhe vendimin e fundit të Gjykatës Kushtetuese, duke thënë se ai i paraprinë kërkesës së LDK-së për interpretimin e sjelljes së kryesuesit të seancës konstituive dhe ndryshimit të procedurës së votimit për kryetarin e Kuvendit.
“Kjo i paraprinë kërkesës sonë që e kemi dërguar për interpretim të sjelljes së kryesuesit të Kuvendit, ndërrimit të procedurës së votimit”, deklaroi ai.
Sipas tij, masa e përkohshme e vendosur nga Gjykata Kushtetuese ka dy kuptime:
Parandalon keqpërdorimet e mundshme gjatë seancës konstituive.
Jep hapësirë shtesë për Vetëvendosjen, në mënyrë që të gjejë bashkëpunim dhe mirëkuptim për konstituimin e Kuvendit dhe më pas për formimin e Qeverisë.
“Për mua personalisht ndoshta i ka dy kuptime kjo çështja e masës. E para që nuk dëshiron të lë ndonjë vakum për keqpërdorimin e seancës… dhe e dyta ndoshta t’i japë hapësirë akoma Lëvizjes Vetëvendosje që të gjejë mirëkuptimin dhe mirëbesimin për të zgjedhur kryetarin e Kuvendit,” u shpreh Zemaj.
“Albin Kurti s’i ka numrat për Qeverinë”
Zemaj ishte i qartë në vlerësimin e situatës politike, duke deklaruar se Albin Kurti dhe partia e tij nuk i kanë numrat për koalicionin qeverisës, dhe se kjo është arsyeja reale e zvarritjes.
“Problemi tashmë është i qartë, ajo çka është evidente: Albin Kurti dhe Lëvizja Vetëvendosje nuk e kanë hallin e Kuvendit, e kanë hallin e Qeverisë. Nuk i kanë numrat për koalicionin qeverisës dhe ky ngërç është pasojë e kësaj.”
Zgjedhjet si opsion i pashmangshëm
Duke folur për mundësinë e zgjedhjeve të parakohshme, Zemaj tha se ato janë gjithmonë një opsion i vlefshëm brenda kornizës kushtetuese, duke nënvizuar se LDK është e gatshme për çdo skenar politik që mund të dalë nga situata aktuale.
“Zgjedhjet janë gjithmonë opsion, sepse janë pjesë kushtetuese dhe procedurale. Ne si parti e pjekur dhe e shtrirë në gjithë Kosovën jemi gjithmonë të gatshëm.”
Sot pritet zhvillimi i seancës së fundit konstituive para skadimit të afatit 30-ditor të përcaktuar nga Gjykata Kushtetuese. Nëse Kuvendi nuk konstituohet, Kosova mund të përballet me një krizë të thellë institucionale dhe me perspektivën e zgjedhjeve të reja.
