Të paktën 11 persona janë plagosur në një sulm me thikë në një supermarket në Michigan, thonë autoritetet.
Një i dyshuar 42-vjeçar ishte në paraburgim pas incidentit në Traverse City, konfirmuan autoritetet.
Një spital aty pranë tha se po trajtonte 11 viktima. “Si rezultat, Departamenti ynë i Emergjencave aktualisht po përjeton një numër më të lartë pacientësh se zakonisht”, tha Qendra Mjekësore Munson në mediat sociale.
Pamjet e postuara në internet tregojnë disa njësi policie dhe ambulancash në parkingun e Walmart.
Zyra e Sherifit të Qarkut Grand Traverse konfirmoi se po hetonte “një incident të shumëfishtë me thikë në Wal-Mart në Traverse City”.
I dyshuari është banor i Miçiganit dhe përdori një “armë të tipit thikë të palosshme”, u tha Sherifi Michael Shea gazetarëve. Incidenti dukej të ishte një “akt i rastësishëm”, shtoi ai.
Ai tha se njerëzit në dyqan ndihmuan në kapjen e burrit dhe ndihmuan në trajtimin e të plagosurve.
“Kjo ishte një përpjekje e përbashkët gjatë gjithë kohës, dhe, siç e përmenda, edhe e qytetarëve,” tha Shea për përgjigjen.
Deri të shtunën në mbrëmje, pesë persona ishin në gjendje të rëndë, ndërsa gjashtë të tjerë ishin në gjendje kritike.
Zëvendësdrejtori i FBI-së, Dan Bongino, tha se personeli federal po përgjigjej për të ofruar çdo mbështetje të nevojshme për autoritetet lokale.
Guvernatorja e Michiganit, Gretchen Whitmer, tha se ishte “në kontakt me forcat e ligjit në lidhje me lajmin e tmerrshëm”.
“Mendimet tona janë me viktimat dhe komunitetin që po përjeton këtë akt brutal dhune”, shtoi ajo.
Traverse City është rreth 410 kilometra në veriperëndim të Detroitit.
