Deputetja e Lëvizjes Vetëvendosje, Fitore Pacolli, ka reaguar me tone të ashpra pas pyetjeve të një gazetareje të RTK-së, që lidhen me subvencionet e dhëna familjarëve të saj – përkatësisht dajës, vëllait dhe bashkëshortit.
Gjatë reagimit të saj, Pacolli akuzoi organizatat për të drejtat e grave për heshtje dhe përdori shprehjen “Jam gru, gur”, slogan i një fushate për fuqizimin e grave në Kosovë.
Deklarata e saj ka nxitur reagimin e ideatores së fushatës “Unë jam gru, gur”, Erëmira Murati, e cila është edhe drejtoreshë e OJQ-së “Cicat”. Ajo kritikoi deputeten Pacolli, duke theksuar se në këtë rast nuk bëhet fjalë për një sulm për shkak të gjinisë, por për veprimet e saj politike.
“Kjo grua nuk po ‘sulmohet’ sepse është grua, por për shkak të veprave dhe qëndrimeve të saj politike. Viktimizimi i tillë nga një ligjvënëse nuk i ndihmon aspak mbrojtjes së grave që me të vërtetë dhunohen sepse janë gra”, ka shkruar Murati në një postim në Facebook.
Ajo i bëri thirrje deputetes që të ndalojë së përdoruri sloganin e fushatës dhe të fokusohet në detyrat që i takojnë si përfaqësuese e popullit.
“Edhe njëherë, stop viktimizimit. ‘Unë jam Gru, Gur’ më së paku mund ta përdorësh ti. Kryej punët tuaja”, përfundon reagimi i Muratit.
