Ministri i Jashtëm i Iranit, Abbas Araghchi, ka lëshuar një paralajmërim të ashpër ndaj Shteteve të Bashkuara dhe Izraelit, duke deklaruar se çdo sulm i ri ndaj territorit iranian do të marrë një përgjigje edhe më të vendosur nga ana e Republikës Islamike.
Deklarata e Araghchit erdhi si reagim ndaj deklaratave të presidentit amerikan Donald Trump, i cili nga Skocia u shpreh: “Ne i kemi shkatërruar aftësitë e tyre bërthamore. Nëse i nisin përsëri, do t’i shkatërrojmë pa hezitim.”
Përmes një postimi në rrjetin social X, ministri iranian reagoi: “Nëse sulmi përsëritet, nuk do të hezitojmë të përgjigjemi në mënyrë më të fuqishme. Nëse ka shqetësime për qëllimet e programit tonë bërthamor, opsioni ushtarak ka dështuar. Një zgjidhje e negociuar është rruga më efektive.”
Më 13 qershor, Izraeli nisi një valë të gjerë sulmesh ajrore ndaj Iranit, duke goditur objektiva kyç, përfshirë shkencëtarë dhe oficerë të lartë ushtarakë të përfshirë në programin bërthamor. Si kundërpërgjigje, Irani lëshoi qindra raketa dhe dronë drejt territorit izraelit. Konflikti zgjati 12 ditë, duke shkaktuar qindra viktima.
Shtetet e Bashkuara ndërhynë më vonë në konflikt, duke bombarduar tre impiante kryesore bërthamore iraniane në Fordow, Isfahan dhe Natanz. Sulmi i koordinuar ndodhi vetëm dy ditë para raundit të gjashtë të bisedimeve mes Uashingtonit dhe Teheranit mbi çështjen bërthamore.
Këto zhvillime kanë rritur tensionet mes dy vendeve, ndërsa pozicionet mbeten të papajtueshme. SHBA kërkon ndalimin e pasurimit të uraniumit nga Irani – një vijë e kuqe për Uashingtonin – ndërsa Teherani këmbëngul se do të vazhdojë me programin, duke e konsideruar atë të “panegociueshëm”.
Sipas Agjencisë Ndërkombëtare për Energjinë Atomike (IAEA), Irani është i vetmi vend pa armë bërthamore që pasuron uraniumin deri në nivelin 60%, një shkallë pranë nivelit të nevojshëm për armë atomike, që është 90%.
Ndërkohë, Izraeli dhe vendet perëndimore vazhdojnë të akuzojnë Iranin për përpjekje të fshehta për të zhvilluar armë bërthamore — pretendime që Republika Islamike i mohon kategorikisht.
