Kryetari i Aleancës për Ardhmërinë e Kosovës (AAK), Ramush Haradinaj, ka shprehur publikisht mbështetjen e tij për protestën e paralajmëruar nga Organizata e Veteranëve të Luftës së UÇK-së (OVL-UÇK) kundër Gjykatës Speciale në Hagë, e cila po zhvillon procesin gjyqësor ndaj disa prej ish-krerëve të UÇK-së.
Përmes një postimi në rrjetet sociale, Haradinaj u rreshtua krah kërkesave të organizatave të dala nga lufta, duke theksuar se ato janë “legjitime dhe të drejta”.
“Qëndrojmë gjithmonë në të drejtën e luftës, në të drejtën e luftëtarëve dhe në të drejtën e popullit. Këto janë themelet mbi të cilat është ndërtuar liria jonë dhe që nuk lëkunden kurrë,” – shkroi Haradinaj në reagimin e tij.
Protesta e paralajmëruar nga OVL-UÇK synon të shprehë pakënaqësinë ndaj zhvillimeve në Dhomat e Specializuara në Hagë, ku po gjykohen disa nga ish-udhëheqësit më të lartë të Ushtrisë Çlirimtare të Kosovës nën akuzat për krime lufte dhe krime kundër njerëzimit.
Kjo nuk është hera e parë që Haradinaj shpreh mbështetje për të akuzuarit në Hagë. Ai ka qenë një prej kritikëve të vazhdueshëm të funksionimit dhe legjitimitetit të Gjykatës Speciale.
