Në ceremoninë e varrimit të mërgimtarit 33-vjeçar që humbi jetën në liqenin e Ujmanit mori pjesë edhe një delegacion nga Presidenca e Kosovës. Presidentja Vjosa Osmani ka shprehur ngushëllime të thella familjes së të ndjerit, duke vlerësuar përkushtimin dhe profesionalizmin e Forcës së Sigurisë së Kosovës (FSK) dhe KFOR-it në operacionin e kërkimit.
“Presidentja Osmani falënderon Forcën e Sigurisë së Kosovës, KFOR-in, si dhe të gjitha institucionet vendore dhe ndërkombëtare për angazhimin e tyre të palodhshëm dhe profesionalizmin e treguar. Ky angazhim është dëshmi e përkushtimit të FSK-së për t’iu shërbyer të gjithë qytetarëve me dinjitet dhe humanizëm”, ka deklaruar këshilltari për media i presidentes, Bekim Kupina.
Ndërkohë, prania e FSK-së në veri – me leje dhe përcjellje të KFOR-it – u keqpërdor politikisht nga partia në pushtet, duke u paraqitur në publik si hera e parë që kjo forcë vepron në atë zonë. Në të kaluarën, FSK ka qenë e pranishme në veri për misione humanitare edhe kur Vetëvendosje nuk ishte në pushtet.
Ambasadat e Gjermanisë, Francës, Italisë dhe Mbretërisë së Bashkuar kanë reaguar duke kërkuar që të mos politizohet kjo ngjarje tragjike dhe të njihet roli i KFOR-it në këtë operacion – rol që, sipas tyre, është injoruar në komunikimet publike nga përfaqësues të pushtetit.
Presidenca, në anën tjetër, nuk ka komentuar nëse e konsideron të papërshtatshëm përdorimin politik të operacionit humanitar nga Vetëvendosje apo ndonjë aktor tjetër politik.
