Sindikata e Pavarur e RTK-së dhe Shoqata Sindikale e Radio Kosovës kanë njoftuar se të martën, më 6 gusht 2025, do të organizojnë një protestë në sheshin “Ibrahim Rugova”, përpara Kuvendit, Qeverisë dhe Presidencës.
Në këtë protestë, të dy sindikatat u kanë bërë thirrje të gjithë punëtorëve të Radiotelevizionit të Kosovës që të bashkohen dhe të kërkojnë të drejtat e tyre.
“Sindikata e Pavarur e RTK-së dhe Shoqata Sindikale e Radio Kosovës ftojnë të gjithë punëtorët e RTK-së që të bashkohen në protestën e përgjithshme që do të organizohet të martën, më 6 gusht 2025, në orën 11:00, me kërkesën e vetme: Transferoni buxhetin e RTK-së të miratuar me ligj, që të marrim pagat për punën e kryer,” thuhet në njoftimin zyrtar.
Më tej, Sindikata e RTK-së shton se deri më 5 gusht do ta përsërisë kërkesën drejtuar qeverisë në detyrë që të ndërmarrë veprime urgjente për zgjidhjen e situatës. Sipas tyre, gjendja financiare në RTK është e rënduar dhe mund të përshkallëzohet nëse nuk bëhet transferimi i mjeteve të miratuara me ligj.
“Presim përgjigje të menjëhershme për të shmangur protesta të tjera dhe tensionim të situatës,” thuhet në fund të deklaratës.
