Ministri në detyrë i Mbrojtjes, Ejup Maqedonci, e ka pritur sot me nderime ushtarake Zëvendës Ndihmës Sekretarin amerikan të Mbrojtjes, David Baker, në kuadër të vizitës së tij zyrtare në Republikën e Kosovës.
Vizita e Baker është e para në vendin tonë në këtë kapacitet zyrtar dhe vjen në një moment të rëndësishëm për marrëdhëniet strategjike ndërmjet Kosovës dhe Shteteve të Bashkuara të Amerikës në fushën e mbrojtjes dhe sigurisë.
Pas ceremonisë zyrtare të pritjes, Baker dhe Maqedonci zhvilluan një takim dypalësh ku, sipas burimeve zyrtare, u diskutua për thellimin e bashkëpunimit ushtarak, mbështetjen amerikane për transformimin e Forcës së Sigurisë së Kosovës dhe objektivin e anëtarësimit të Kosovës në NATO.
Gjatë ditës, Baker është takuar edhe me Presidenten e Kosovës, Vjosa Osmani, ku u riafirmua përkushtimi i SHBA-ve për sigurinë dhe stabilitetin në rajon, si dhe për forcimin e kapaciteteve mbrojtëse të Kosovës.
Pas takimit me ministrin Maqedonci, është paralajmëruar edhe një konferencë e përbashkët për media, ku pritet të jepen më shumë detaje rreth agjendës së bashkëpunimit dypalësh dhe projekteve të ardhshme në fushën e mbrojtjes.
