Instagram ka vendosur një rregull të ri që ndalon përdoruesit me më pak se 1,000 ndjekës të transmetojnë “Live” në platformë. Kjo masë ka filluar të zbatohet për llogaritë publike, ndërsa përdoruesit kanë raportuar se nuk mund të shfrytëzojnë më funksionin për transmetime të drejtpërdrejta.
Kur dikush përpiqet të nisë një “Live”, shfaqet një njoftim që thotë: “Kemi ndryshuar kërkesat për përdorimin e kësaj veçorie. Vetëm llogaritë publike me 1,000 ndjekës ose më shumë mund të krijojnë video ‘Live’.”
Meta, kompania mëmë e Instagramit, ka konfirmuar për Engadget se ky ndryshim është pjesë e përpjekjeve për të përmirësuar përvojën e përgjithshme të përdoruesve dhe për të ofruar një platformë më cilësore për krijuesit e përmbajtjes që transmetojnë drejtpërdrejt. Megjithatë, kompania nuk ka sqaruar pse përdoruesit me më pak se 1,000 ndjekës nuk mund të ofrojnë një përvojë të mirë “Live”.
Ndryshimi pritet të shtrihet edhe te llogaritë private, edhe pse për momentin është në fazën fillestare të zbatimit. Kjo nënkupton se Instagram mund të ketë hequr tashmë edhe mundësinë që përdoruesit të transmetojnë “Live” për vetëm tre miq të afërt – një funksion që ishte prezantuar në vitin 2024.
