Komisioni Evropian bëri të ditur të premten se 26 kompani të mëdha, përfshirë emra të njohur si Amazon, Google, Microsoft, IBM, OpenAI dhe Mistral AI, kanë nënshkruar Kodin e Praktikës për Inteligjencën Artificiale të Përgjithshme (GPAI) në përputhje me Aktin e Inteligjencës Artificiale të Bashkimit Evropian, i cili hyn në fuqi më 2 gusht.
Ky kod përmban rregulla vullnetare që synojnë të garantojnë transparencë, siguri dhe mbrojtje të të drejtave të autorit në zhvillimin dhe përdorimin e teknologjive të avancuara të inteligjencës artificiale.
Në mesin e nënshkruesve është edhe startup-i gjerman Aleph Alpha, ndërsa kompania Meta ka refuzuar të bashkohet, duke argumentuar se Kodi kufizon inovacionin dhe kritikuar qasjen e BE-së ndaj rregullimit të inteligjencës artificiale.
Nga ana tjetër, XAI – zhvilluesi i modelit Grok për platformën X – ka nënshkruar vetëm kapitullin që lidhet me sigurinë dhe mbrojtjen, duke u zotuar të përmbushë pjesët e tjera përmes alternativave të pranueshme.
Të gjitha shtetet anëtare të BE-së duhet të caktojnë autoritete kombëtare mbikëqyrëse për zbatimin e Aktit. Në rast të shkeljeve, kompanitë përballen me gjoba deri në 15 milionë euro ose 3% të të ardhurave vjetore globale – në varësi të shumës më të lartë.
