Bashkimi Evropian ka vendosur të pezullojë për gjashtë muaj dy paketat e kundërmasave doganore ndaj tarifave të vendosura nga Shtetet e Bashkuara, pas një marrëveshjeje të arritur me presidentin amerikan Donald Trump. Lajmin e ka konfirmuar të hënën një zëdhënës i Komisionit Evropian.
Megjithatë, marrëveshja BE-SHBA lë ende shumë çështje të hapura. Ndër to janë tarifat për pijet alkoolike dhe urdhri ekzekutiv i Trumpit i javës së kaluar, i cili vendos tarifa 15% për shumicën e mallrave evropiane, pa përjashtuar sektorë si ai i automobilave dhe pjesëve të këmbimit.
Zyrtarët evropianë kanë paralajmëruar se priten urdhra të tjerë ekzekutivë nga administrata amerikane në ditët në vijim.
Sipas zëdhënësit të Komisionit, BE-ja po vazhdon punën me SHBA-në për të finalizuar një Deklaratë të Përbashkët, siç është rënë dakord më 27 korrik, me synimin për të zbutur tensionet tregtare dhe për të gjetur një zgjidhje afatgjatë.
