Ish-ambasadori i Holandës në Kosovë, Robert Bosch, u ka bërë thirrje qytetarëve që të marrin pjesë në protestën e nesërme në mënyrë të qetë e dinjitoze, pa dhunë dhe pa slogane fyese.
Duke kujtuar se ka shërbyer në Kosovë në kohën kur u themelua Gjykata Speciale, Bosch thotë se ky institucion ka devijuar nga misioni për të cilin u krijua. Ai thekson se gjykata u ngrit mbi pretendimet për trafik organesh, por pasi hetuesi Williamson përfundoi se një gjë e tillë nuk kishte ndodhur, ajo duhej të ishte ndërprerë.
Sipas tij, Gjykata Speciale operon pa mbikëqyrje dhe transparencë, ndërsa pranimi i provave të fundit nga Shërbimi Sekret i Serbisë vetëm sa e minon më tej besueshmërinë e saj.
Bosch vlerëson se kjo gjykatë, e cila përbën një kosto të madhe për taksapaguesit, duhet të shfuqizohet, për t’i hapur rrugë krijimit të një gjykate për krimet e luftës në Kosovë.
“Nëse protestoni, bëjeni me dinjitet – pa dhunë dhe pa slogane të këqija”, është mesazhi i tij për qytetarët e Kosovës.
