E mbijetuara e dhunës seksuale gjatë luftës dhe ish-deputetja e Kuvendit të Kosovës, Vasfije Krasniqi-Goodman, ka shprehur publikisht mbështetjen e saj për protestën e paralajmëruar më 7 gusht në Prishtinë, e cila organizohet si reagim ndaj, siç u cilësua, “padrejtësive të Gjykatës Speciale ndaj ish-udhëheqësve të UÇK-së”.
Në një postim në rrjete sociale, Krasniqi-Goodman ka bërë të ditur se do të marrë pjesë në protestë, duke thënë se qëllimi i saj nuk është mbrojtja e individëve, por ruajtja e dinjitetit kolektiv të luftës çlirimtare dhe kërkesa për drejtësi të barabartë.
“Arsyeja pse më 7 gusht do të jem në protestë është e thjeshtë: përballë një bote ku kriminelët serbë ende janë të lirë, është e papranueshme që ish-ushtarët tanë të përballen me padrejtësi,” ka shkruar ajo.
Krasniqi-Goodman shtoi se nuk mund të ketë paqe pa drejtësi, duke e cilësuar UÇK-në si mburojën e popullit të Kosovës, dhe refuzoi çdo tentativë për “njollosjen e historisë” së luftës.
“Unë dal si qytetare e këtij shteti që s’mund të rrijë duarkryq teksa historia jonë përpiqet të njolloset me standarde të dyfishta… Prandaj më 7 gusht jam aty. Për historinë, për dinjitetin, për Kosovën!”, përfundon ajo.
Protesta e 7 gushtit vjen në vazhdën e reagimeve publike ndaj procesit gjyqësor në Hagë ndaj ish-drejtuesve të Ushtrisë Çlirimtare të Kosovës, për të cilët mbështetësit pretendojnë se po gjykohen padrejtësisht.
