Qytetarë të shumtë janë mbledhur sot në sheshin “Skënderbeu” në Prishtinë, ku në orën 17:00 pritet të nisë një protestë e organizuar nga veteranët e Ushtrisë Çlirimtare të Kosovës. Qëllimi i protestës është kundërshtimi i veprimeve të Gjykatës Speciale, të cilat protestuesit i konsiderojnë të padrejta ndaj ish-pjesëtarëve të UÇK-së.
Ndër të pranishmit është edhe Hysni Gucati, ish-kryetar i OVL-UÇK, i cili ka përshëndetur protestuesit duke u bashkuar me bashkëluftëtarët e tij.
Kujtojmë se në maj të vitit 2022, Gucati dhe zëvendësi i tij u dënuan me katër vjet e gjysmë burg për akuzat e pengimit të drejtësisë. Më vonë, Gjykata e Apelit ua uli dënimin për tre muaj.
Protesta pritet të shoqërohet me mesazhe të forta në mbështetje të ish-ushtarëve të UÇK-së dhe kundër asaj që të gjithë janë të bindur dhe e quajnë padrejtësi ndërkombëtare.
