Për herë të parë, festivali ndërkombëtar i xhazit “Mitrovica International Jazz Days”, që tradicionalisht zhvillohet në pjesën jugore të Mitrovicës, u organizua sot edhe në pjesën veriore të qytetit. Aktiviteti u mbajt në shëtitoren e qytetit dhe u shoqërua me masa të shtuara sigurie nga Policia e Kosovës, përfshirë njësi speciale dhe zyrtarë në rroba civile.
Organizimi i këtij eventi muzikor hasi në kundërshtim të fortë nga komuniteti lokal serb, i cili e konsideroi atë si një provokim politik. Gjatë performancave, pati fishkëllima dhe brohoritje kundër artistëve dhe kryetarit të komunës, Erden Atiq, nga qytetarë serbë që qëndronin në kafenetë përreth.
Tensionet u përshkallëzuan kur dy të rinj serbë u arrestuan nga policia. Sipas zëdhënësit të Policisë për Rajonin e Veriut, Petrit Fejza, njëri prej tyre u ndalua për shkak të ofendimeve drejtuar kryetarit Atiq, ndërsa tjetri për kërcënime ndaj individëve të pranishëm dhe forcave të rendit. Ai shtoi se hetimet janë në fazë fillestare dhe informacionet janë ende preliminare.
Arrestimi i të riut të dytë, që refuzonte të futet në veturën e policisë, shkaktoi zemërim te të pranishmit, të cilët brohoritën “Lironi fëmijët!”, duke shprehur pakënaqësi për ndërhyrjen e policisë.
Festivali në veri është pjesë e një programi treditor që zhvillohet deri më 10 gusht në pjesën jugore të Mitrovicës. Sipas organizatores Rona Nishliu, e njohur si përfaqësuese e Shqipërisë në Eurovision 2012 dhe artiste me prejardhje nga veriu i Mitrovicës, qëllimi i festivalit është të bashkojë qytetin përmes muzikës.
Nishliu tha për mediumin “Alternativna” se kishte kontaktuar muzikantë lokalë për të marrë pjesë, por shumica kishin refuzuar për arsye pushimesh ose shëndeti. “Nëse ka njerëz, mirë është. Nëse ka pak, edhe më mirë. Qëllimi ynë është të sjellim muzikë dhe gëzim për qytetin”, u shpreh ajo.
Megjithatë, organizimi i koncertit në veri është parë si provokim nga përfaqësues të komunitetit serb. Lista Serbe dhe Aleksandar Arsenijeviq, udhëheqës i partisë Demokratike Serbe, e cilësuan festivalin si një akt të motivuar politikisht nga Qeveria e Kosovës dhe Lëvizja Vetëvendosje. Arsenijeviq e quajti atë një “përpjekje për vendosjen e dominimit etnik e kulturor” dhe një mjet të “fushatës parazgjedhore të Albin Kurtit”.
Ndryshe nga vitet e kaluara, ku Mitrovica Veriore organizonte vetë festivalin ndërkombëtar të xhazit dhe bluzit “North City Jazz and Blues Festival”, këtë vit nuk pati pjesëmarrje nga muzikantë lokalë të veriut.
Ngjarja mbetet në fokus për shkak të tensioneve ndëretnike që ajo nxori në pah, pavarësisht përpjekjeve për të ndërtuar ura komunikimi përmes kulturës dhe muzikës.
