Kabineti i Sigurisë së Izraelit ka miratuar planin e Kryeministrit Benjamin Netanyahu për pushtimin e qytetit të Gazës, pavarësisht paralajmërimeve të fuqishme nga komuniteti ndërkombëtar për një krizë humanitare në përkeqësim dhe kundërshtimeve të brendshme në rritje.
Në një deklaratë të lëshuar të premten nga Zyra e Kryeministrit thuhet se është aprovuar propozimi për të “mposhtur Hamasin”. Sipas këtij plani, Forcat Mbrojtëse të Izraelit (IDF) do të përgatiten për të marrë kontrollin e qytetit të Gazës, ndërkohë që do të lejojnë shpërndarjen e ndihmave humanitare për civilët jashtë zonave të konfliktit.
Vendimi është marrë në një kohë kur situata në Rripin e Gazës po përkeqësohet dita-ditës, me mungesë akute të ujit, ushqimit dhe ndihmës mjekësore. Brenda vetë Izraelit, një pjesë e madhe e opinionit publik ka shprehur shqetësim për rreziqet që mbart operacioni, duke përfshirë përshkallëzimin e konfliktit dhe humbjet e mundshme civile.
